لست عالما نفسانيا ولا انامن المنجمين ، لم ادع يوما انني شيباني او فلكي او ممن يقرأون الكف ، لكنني استند الى المعطيات واتوقع ردات فعل الناس ازاء مايجري اليوم من تفجيرات هزت البلد عرضا وطولا .. اليكم ما قاله العراقيون بعد التفجيرات ..
عامل في مسطر
الله واكبر على روسكم .. وين نروح ، طلعت رواحنه ، يلّله هالاسبوع ما اطلع عدنا بيتنجان وطماطة عود من يخلصن الله كريم . سائق تكسي شسوي طالع ، ناس بالشارع ماكو العالم تخاف ، واني طالع عبالك رايح للحرب، كل ما اطلع اسلم على جهالي عبالك اشوفهم اخر مرة .. الاقساط مال السيارة سهلة عود اعوضهن الاسبوع الجاي ولا اموت ويتيتمون اطفالي.
امرأة ذاهبة للسوق خليتها تصير دنيا الظهر الله طلعت ، ماعدنه مسواك ، شنسوي نخاف ، ماكو مكان ما فجرو بيه ، جا وينها الحكومة ، والله ملينه ، راح اتسوك مال اسبوع واجي والله كريم ، هي هايعيشتيش .
عامل تنظيف والله يابه كمنه نخاف منشتغل، الكارتونه عبالنه عبوة ، السيارة تفوت نلبد ، منكدر نشتغل ، الانفجارات بكل مكان واحنه شغلنه عالشارع .. بس اكعد يوم يومين يبطلوني ، واني اكل يوم بيوم ، ماعندي فلس واحد بالبيت . الله كريم .
برلماني
اهووووو هم تفجير . تعال كل شوية وتصريح وشنو رأيك وشنو الحلول ، هاي شلون دوخة ، بالله شنكول بعد ، مابقىشي نتعذر بيه للناس ، .. تعال بابا هاك السويج نزل الغراض من الجنطة ، وينك حرس ، نزل السمجات لا يخربن ..اليوم عازمين اصدقائنا همه وعوائلهم .
وزير همزين اني مو وزير امني جان شخلصني ، الحمد لله .. بابا خل الحراسات ينتبهون ، ولو احنه ما يمنه شي بس خاف الاطفال يسمعون صوت الانفجار وتتأذى نفسيتهم .
رجل واقف على باب ثلاجة الموتى ابني علاوي ، شطلعك اليوم ، مو كتلك لتروح ، شطلعك اليوم .. الشغل احنه شحصلنه من الشغل ، ليش ابني هيج سويت بيه . الله اكبر على راس الحكومة .. احنه شنسوي بالعراق بعد راح انهج .. بوية علاوي شلي بالدنية بعدك .. الهل اكبر
رئيس الحكومة اليوم هم اكو تفجيرات ؟ بالله هاي شلون تخلص ، اكلك ياسين اليوم شنو عدنه اجتماع ويا عشائر الانبار ؟ شتكول احجي بقوة وياهم لو شوية نخفف ؟ المهم تعال شوفلي الجدول باجر اشعدنه .. التفجيرات وين ؟ جيبلي مي بابا .. شوفلي الطبيب ابو القالون ، هذا احمد ولا خابر ؟ مو الجو محترك .. يالله تخلص ، لا متخلص ..مننطيها .
المقالات والاخبار المنشورة لاتمثل بالضرورة رأي الشبكة كما إن الشبكة تهيب ببعض ممن يرسلون مشاركاتهم تحري الدقة في النقل ومراعاة جهود الآخرين عند الكتابة
مشاعر العراقيين .. بعد التفجيرات 
