في خبر عاجل تناقلته وسائل الأعلام حول الفوضى العارمة التي أعترت وزارة الدفاع بعد وصول كتب متتالية بترقية ضبط مقربين من المالكي وخارج السياقات العسكرية , حيث ان المعتاد ان تصدر الترقيات بتأريخ ١-٦ من كل عام (يعني موبوكته ) , وأضاف المصدر ان الجيش العراقي يضم اكثرمن ١٥ رتبة فريق ركن , على صعيد اخر تم حشد الكثير من القطع العسكرية والدبابات خوفا من انقلاب عسكري وشيك ) .
عفوا سادتي على الإطالة ولكن نحن في العراق نرى العجب العجاب وهذا غيض من فيض في العراق ولنسأل القائد ابو اسراء رجل الساعة وكل ساعة ( بس السويسري الأصلي راس كوب لا ) وحدة وحدة ويانة . تعليقا على الخبر الأول ما بيه شي ابن عمك ابن خالك مريودة قابل بس الوزراء يعينون كرايبهم , ومن باب (مركتنة على زياكنة) . المصيبة الثانية عفوا الخبر الثاني ( اخ منك يالساني ) الذي يشير الى ان لدينا رتب فريق ركن في الجيش العراقي أكثر من اكبر جيش في العالم وهو الجيش الأصفر دلالة على الجيش الصيني (وليس السيارات الصفر التكسي ), (مع احترامنا وتقديرنا لسواق الصفر ), ( عميد عطا ابو النشرة ) اشهر من تسنم رتبة فريق حاليا وان لاحظتم سادتي انه يوكف صفح دلالة على الركن ,قد يقول البعض انك شخص حسود ( يابة لزمت الخشب وقريت المعوذات وعيوني مو زرك ) . وهم حقة المالكي احنا نريد زيادة الامان ومحاربة الإرهاب وبمقتضى الخطة الأمنية العبقرية والتي يشرف عليها شخصيا هو بحاجة الى زيادة عدد السيطرات وبالتالي زيادة عدد الجنود والضباط وصولا الى رتبة فريق ( فريق رتبة عسكرية مو البرشة ولا الريال ) , وبزيادة الاختناقات المرورية يزداد صرف الموبايل والكارتات والكرزات والمشروبات وتنزل الرحمات على كل من سوة هاي الازدحامات وبالتالي يعم الخير على العراقيين المرفهين بإيجاد سوق عمل عند السيطرات وتقل البطالة ( البطالة من عطالة بطالة مو البطالة المستخدمة في العركات ), كتلكم خطة عبقرية ؟ الثالثة شلون ترهم ابو اسراء ... انقلاب ودبابات ’ الا اذا اخذناها بحسن نية. وهنا لك الحق كله الم تدعوا سيادتكم الى نبذ الخلافات والمصالحة الوطنية في كل خطبك ؟؟ المصالحة يرادله مؤتمر والحضور يرادلهم ايدام وانت معزب ومن هسه تطبخ وتهلي وتتهم وتصعد سياسيا وتريد حكومة وحدك انته وربعك بس ديمقراطية ؟ اشهد بالله انت ذكرت الديمقراطية في خطبك الكثيرة؟ اما العراق والعراقيين الهم الله , ولاننسى التركيبة الجديدة التي رتبته لأخذ الثالثة مو قصدنه مرة ولو الدين محلل اربعه بس قصدنه ولاية الولاية الثالثة وما بيه شي خليت حمودي رئيس مكتب وبيده الحل والربط يودي ويجيب بكيفه يصعد وينزل حتى يرتبلك الأمور وبالتالي ينطبق المثل القائل ( الجدر ما يقعد الا على ثلاث) وعلى الراسين نصيحتي الأخيرة العراق اكبر من كل الكتل السياسية وازماتها حافظ على العراق مو على الكرسي وابو اسراء لا تكبر اللكمة اخاف تغص .
bahlol.alhakeem@yahoo.com
التعليقات
الإسم:
ابو الاوساف
النص:
الشعب كلة صار منتسب وماكو امان ملينة والله ملينة فواكه منكدر نشتري هههههههه
المقالات والاخبار المنشورة لاتمثل بالضرورة رأي الشبكة كما إن الشبكة تهيب ببعض ممن يرسلون مشاركاتهم تحري الدقة في النقل ومراعاة جهود الآخرين عند الكتابة
بهلوليات
