منتديات فدك الثقافية - آني اعوفك يا علي بس بشروط ## للشاعر ايهاب المالكي

منتديات فدك الثقافية (http://www.afadak.com/forum/index.php)

- منتدى الشعر الشعبي (http://www.afadak.com/forum/forumdisplay.php?f=38)

آني اعوفك يا علي بس بشروط ## للشاعر ايهاب المالكي

اني اعوفك ياعلي بس بشروط
الكه واحد مثلك الينخاه مُجاب
وكون نايم ليلة بفراش الرسول
وكون قاتل مرحب وشالعله باب
وكون اذا مات النبي ومابايعوه
مايجر سلاحه ويسوي انقلاب
وكون من يصير امير المؤمنين
مو براتب يشتغل بس للثواب
وكون شاغل كرسي مو مشغول بيه
مو مخلينه فقط يملي النصاب

ياعلي شتستاهد الكالك بديل
يكدر ايرد الشمس وقت الغياب
انت سر القوة عند المسلمين
بغيرك انظل اعزل ابين الذياب
ياترف لمن تجي اكبال الضعيف
عكس سيفك من يمر فوك الرقاب
الله من انطه اليحبونك جنان
لازم انطه الما يحبونك عذاب
انته محد صورك تطعم يتيم
لاجرايد نشرتك تكسي الثياب
منو اليعرف بيك من تنطي لفقير
الله يدري وجفك ويدري النقاب
البيه اتراب وظال ماجايسته ايد
يعني محد رايده وبي شي يعاب
وانته يابو اتراب عكس الفكره هاي
سر محبتك يكمن بهذا التراب
منو مثلك حتى رأيك عنده عين
وجانو ايلقبونها بعين الصواب
الحاربك ماقاري صفحه من الكتاب
وجا اسوالك اذا قاري الكتاب
انت بالمحراب من تهوى وتطيح
باجر اترد توكف بيوم الحساب
وما نتيهك واضحه اوصافك اكيد
زايرينك وانعرف لون القباب
وحتى اذا تيهنه هم نسأل عليك
ماكو غير حيدر وصاحب مصاب